Iulii Caesaris Stellae Columbeidos liber primus
Inventum pugnata cano pia bella per orbem,
magnanimumque Ducem, terris qui primus Iberis,
axis ad oppositi populos, ignota Quiqueiae
littora fecit iter, secretaque regna retexit.
Ille graves rerum constanti pectore casus
pertulit, et magnos pelago, terraque labores,
inceptis dum monstrum Erebi felicibus obstat,
multaque bellando expertus, dum tecta locaret
tuta suis, ritusque pios, moremque sacrorum
conderet, unde novas passim venerata per aras
in summos nunc relligio successit honores.
Tu modo, quae iustos nunquam frustrata vocatus
vota foves hominum, et promisso munere damnas,
Virgo Parens, sic te terra, caelique potentem
agnoscat, Natique tui sub Rege Philippo
Indus uterque pari veneretur numina cultu,
affer opem, aspiraque mihi, quodcumque Columbus
gessit equis, et classe, tuum est: Te iusta iuvantem
proelia saepe gravi rerum discrimimine sensit,
Te duce durum vicit iter, trans solis, et anni
ire vias ausus: Tu me tua dona canentem
Diva mone, coeptisque volens ingentibus adsis.
Studium Angelopolitanum 